Fyrsti í Mótmælum.

Heimsótti Austurvöll í gærkveldi þegar mótmælin voru í gangi.

Varð svo frægur og óvinsæll hjá sumum að tala til vina minna sem voru að mótmæla og byðja þá um að sýna stillingu eftir að einhverju var kastað í "vegg" óeirðarlögreglumanna, einn mótmælandinn varð svo æstur að hann hótaði að berja mig og hefði sennilega reynt það ef ekki hefði notið við nokkura félaga hans sem voru ekki alveg eins ölvaðir og viðkomandi.

Allaveganna þá virðist lögreglan hafa gleymt viðleitni minni til að reyna að fá fólk til að hætta að kasta grjóti etc. í lögregluna, (veit ekki hvort það urðu vaktaskipti eða hvað) allaveganna þá var ég handtekinn eftir að hafa fengið slatta af "mace" úða í augun, undir því yfirskini að ég hafi ætlað að frelsa einhvern sem lögreglan var að handtaka og undir þetta rugl skrifa 4 lögreglumenn.

Ég sat allaveganna í steininum yfir nóttina og var svo þvingaður til að skrifa undir 10.000kr "pissusekt" sem ég kem ALDREI til með að borga. Er að fara að skella mér í bað og þvo af mér piparúðan/táragasið, og svo labbar maður auðvitað í bæinn til að mótmæla aðeins meira. spurning um að lögreglan borgi gleraugun sem ég tapaði við þessa ólöglegu handtöku og fötin mín sem eru öll í drasli eftir að ég var dreginn öskrandi eftir malbikinu eftir að hafa verið gasaður ?

Viðbót.: Þrátt fyrir að hafa margítrekað beðið um að fá læknisskoðun vegna mikilla sárinda eftir að hafa fengið táragas/piparúða yfir allt höfuðið var því ítrekað hafnað af lögreglustöðinni á Hverfisgötu, enda svosem skiljanlegt í þessum samdrætti að það sé ekki hægt að veita grenjandi (haha) mótmælendum læknisaðstoð.